Bere bakarkako bigarren diskoarentzat, Ekhi Lambertek hainbat musikarirekin obra oparo, zorrotz eta anbiziotsua sinatzen du. Inbasioak diska anitza iragartzen da, bazter, xoko eta pasabidez betea. Pop orkestralaren ildoan, musikari desberdinen laguntzarekin gauzatu izan du lan hori : hauek dira Oiasso Kameratako sokak, Joseba Irazoki, Félix Buff, Oihan Oliarj-Ines, Ludovic Leriche… Diskoa 2023ko primaderan grabatua izan da Garate (Kaki Arkarazo) eta Shorebreaker (Johannes Buff) estudioetan. Taula gainean, kantagintza eta poesiari lehentasuna emanez, Ekhi Lambertek seikote edota bikote moduan aurkezten dizkigu bere kantu berriak. Lehen partituretatik azken grabaketa sesioak arte, amets batek arrarokeriak bizikide egiten dituen gisan, Ekhi Lambertek atmosfera elegante eta epiko baten jostea lortu du. Musika orkestral horren lerroetatik at, askatasun espazio handiak utzi izan zaizkie musikariei. Hastapen batean lan bakartia zena kolektiboa bilakatu da, nolazpait inbaditua. Orkestrak gailur magnetikoak igaiten dituenean ere, sinfoniak ahots bakartiaren oihartzuna xumeki segitzen du, olerki labur batzuen musikatzekotan. ENTZUN  

Mukuru kolektiboko kideak Durangon izango gara berriz ere, Balio dute kolektiboarekin azken hiru urteetan izan dugun partaidetza berrituz. 10 musika proiektuk osatzen dute gure kolektiboa egun, eta 2023 honetan bi nobedade ekarriko ditugu gure stand- era. Batetik Kadira taldearen lehenengo lana aurkezteak asko pozten gaitu. Kadira taldea 2021ean sortu zuten Lorea Zulaika eta Aritz Aramendik. Izen bereko lehenengo lan hau 8 abestiz osatutako albuma da eta batez ere rock eta pop doinuak aurki daitezke bertan, baina erritmo afroamerikarren influentziak nabari dira. Bigarrenik Nigara zuek- en "dai dai" diska dugu berritasunen artean. Ander Fernandez- ek bere bakarkako proiektuaren izenpean argitaratzen duen 4.a. Oporretatik ekarritako oparia omen da, batez ere gitarra soil eta soinu paisaiez osatua, bidean grabatua, bidaia baten kronika edo souvenir antzeko bat. Biak ere CD formatuan kaleratuko dira eta Nigara zuek- ena postal formatuan ere eskuratu ahal izango da. https://kadira.bandcamp.com/album/kadira https://nigarazuek.bandcamp.com/album/dai-dai

Hemezortzi urteren ostean Klak!son-en ibilbidea etetea erabaki dugu. Tartean 4 diska eta makina bat kontzertu egin ditugu. Euskal Herriko musikari egindako ekarpenaz haratago, bidean egin ditugun lagunak eta harremanak baloratzen ditugu batez ere, eta gu boston artean sortu den konplizitatea eta maitasuna. Izan ere, proiektu honen oinarria horixe izan da; laguntasuna. Era berean, eskerrak eman nahi dizkizuegu alboan izan zaituztegun eta Klak!son-en parte izan zareten guztioi: Zuzenean proiektuan parte hartu duzuenoi; Vargas, Txupi, Borja eta Pini. Baita kolaborazioak edota kantak sortzen lagundu diguzuenoi; Pepi, Iraia, Hodei, Susaeta, Ander Azkarate, Izaro (Elvis), Isuo, Aitor Zabaleta, Aitor Lasku, Mikel Arregi, Kezman eta Dabor (Whiski supplier). Diska grabatzerako soinu teknikariei, Pit, Nestor Varela, Alvaro Remacha, Ander Barriuso (Shot)... Bikote eta familikoei, batez ere Laskurainen etxekoak bezala hartu gaituzuenoi, aupa Karmentxu! Lagunak, Ibonzori aipamen berezi bat; "Maite zaitugu", baita, Antzuola, Urretxu eta Zumarragako lagunei. Eskerrak Goiena komunikazio taldeari (Iker, Aintzane, Maider, Usoa eta Amaia) eta Otamotzi, kobertura emateagatik. Esker berezi bat ere kontzertuetan horren ondo hartu eta afaltzen eman diguzuen hoiei, momentu ederrak izan dira mahaiaren bueltakoak. Baita borondatez soinu teknikari lanetan ibili zareten lagunei. Eskerrak oro har musikaren alde egiteagatik: Mundumira, Puntaik Punta, Durangoko Azoka, MuTaMu, Gasteizko Doors taberna eta Evelio (Täntra), Santurtziko Munich 72, Danbaka (Elgetako kafe antzokia), Anoetako gaztetxea (6garren ez kontzertu famatua), Arrasateko Gure Leku, Idiazabal, Orioko Salatxo, Ondarroako Gaztetxea eta Nekro, Alegiako Gaztetxea, Putzuzulo, Iurretako jaiak, Doka eta Mahaster River, Eitzako jaiak, Ezkioko jaiak, Bergarako Pol Pol eta Laño Skate Park (Nahia), Orioko Etxeluze Gaztetxea, Eskoriatzako Cipris taberna, Osintxuko txoznak, Azpeitiko Gaztetxea eta MKT, Oñatiko Aker taberna eta Eneko Egea, Arrasateko Ekaitz taberna, Arrasateko Gaztetxea, Kooltur ostegunak, Mogambo, Kale Gorrian (Eros), Abadiñoko Sirimiri (orain Munts), Errenteriko Niessen aretoa, Berako Kataku ostatua eta Ibai, Atxondoko Gaztetxea eta piszinak (Matxorri), GKS, Mitu eta Frigo, Bergarako Gaztetxea (Kepa, Alain eta Martin Zaitegi), Muskulo taldeko lagunak, Antzuolako Gaztetxea eta bertatik pasatu diren guztiak, Antzuolako Kultura (JuanLu eta Jone Larrañaga), Torresoroa eta Zelai Aristi antzokiak, UZ Txozna batzordea, GazteleKU, MusiKUaldia, Bixamona fest eta Kkinzonako lagunak (Berasa, ez zaitugu ahaztuko!), Fox, Huts, Mox (Txurro), Aitz Garbi (Bingen, Juena, Pepi eta Lourdes), Zero, Surpe eta batez ere Antzuolako Txozna batzordea, makiña bat aldiz gonbidatu baikaituzue. Zumarraga, Urretxu eta Antzuola gure herri maiteei, beti goxo hartu gaituztelako. Milesker! Bukatzeko, eskerrak Mukuru kolektiboko bidelagunei. Zerrenda honetan ahaztu zaituztegunoi ere, barkamen sakonak eta mila esker! Ondo izan eta zaindu. Kontzertuetan ikusiko dugu elkar! Klak!son (Iongu, Bargi, Orma, Alkorta eta Arri)

Txost! taldeak kontzertua eskainiko du Zumarragako adinekoen egoitzan martxoaren 3an arratsaldeko 16:30etan. Oraingo honetan kontzertua publikoari irekia izango da.

2022ko Irailaren 2an, ostiralez Astigarretan aurkezpez kontzertua (argazkian) egin zuen Urretxu-Zumarragako taldeak bigarren lana argitaratuz, 8 kantuz osatua. 2018ko Erreferak esperantza estreineko diskan hasitako bideak jarraipena izan du abesti-sorta honetan, baina tresna, giro eta kolore berriekin zipriztindu da. Batetik, Paxkal Irigoyen bosgarren kidea gehitu da, teklatua, saxofoia eta ahotsekin diskari bere ikutu berezia erantsiz. Bestetik, Kezman efektuak erabiltzen hasi da, ahotsean zein tronpetan: oihartzunak, zortzidunak, eta abar. Eta oro har konposaketan zein kantuen itxuran aniztasun handiko diska da. Egile-popa edo pop urduri eta ausarta bezala izendatzen duten estiloan berritasun nabarmenak sartu dituzte. Ahotsez soilik osaturiko kantu bat dago, ikutu asiar, arabiar zein mexikarrak topa litezke, erritmo eta metrika bakoitiak eta aldakorrak, polirritmiak, distortsioak, zintzarriak… Hitzetan ere anitza da Euri-ura. Ogñi Somarrek (Txost!-en eta Isuo ta Kezmanen kolaboratzaile ohikoa) eta Gorka Erostarbek hartu dute parte. Poema alai eta zoroez gain, amodiozko kantu bat, kritika soziala, kexa, desadostasuna zein hausnarketa existentzialak jorratu dituzte. Euri-ura Mukuru kolektiboaren 17. erreferentzia dugu. Ekoizpena taldeak berak egin du, soinuari zein edizio fisikoari garrantzi eta mimo berezia eskainiz.

Txost!, Ekhi Lambert eta Hegazkin-ek kontzertua emango dute Aldaia tabernan, Larrean (Barrundia, Arabako Lautada). Ez da nolanahiko emanaldia izango hainbat kolektiboren elkarlanetik sorturikoa: Mukuru, GaraiOn Sorgingunea, Aldaia Taberna eta Barrundiako Kultur Traktorea. Abuztuaren 28an izango da, larunbatarekin, 18:00etan. Ikus-entzuleentzat ondoren bertan afaltzea ez litzateke batere plan txarra.

Iritsi da Mukururen 12. erreferentzia: Hegazkin talde berriaren "Haize beltzak". Sintetizadoreak, kitarra elektrikoa eta ahotsa erabili dituzte Alaynek eta Isuok pop edo trip hop moldeko sei kantu osatzeko. Entzungai segidan:   https://mukuru.eus/hegazkin https://hegazkin.bandcamp.com/ https://www.badok.eus/euskal-musika/hegazkin/haize-beltzak/   Sintetizadoreak eta gitarra elektrikoa: Alayn Carazo Iturriaga Ahotsa: Iosu Isaias Villanueva Castro, “Isuo” Grabaketa eta nahasketa: Ander Barriuso Muñoa (Elektrika Grabaketak), Shot! estudioan Masterizazioa: Oihan Lizaso, 2noisy estudioan Diseinua eta maketazioa: Aritz Ormazabal Barrios Laguntzaileak: Mikel Arriaran Iraeta, Ander Bolibar Zabala, Jokin Guridi Urrutia, Idoia Hernandez Toledo. Haize beltzak. Hegazkin, 2021. MKR012

  Mukuru Zuzenean Nonahi sortaren 7. bideoa. Konfinamenduan argitaratutako Nor Zara Zu? Peruren azken diskoko Waio eta Hitzen Hitzak kantak zuzenean. Idoia Arizaleta gitarran eta Xanti Etxeberria kontrabaxuan, Jazar sorkuntza espazioan grabatua, Iruñean.

BERRIA egunkaria. 2021/12/21 (Andoni Imaz) Bateriak ezartzen du erritmoa, trostan elkartzen zaio pianoa, eta haien gainetik ageri dira biolina eta ahotsa, arin, jauzika. Antzoki batean daude erosoen, hori da lekurik aproposena Hatxerentzat. Hatxe Idoia Hernandez da, baina Ilargi Agirre, Peru Galbete eta Jurdana Otxoa ere badira Hatxe. Panpin hautsien dantza diskoa atera dute aurten, eta atzo aurkeztu zuten Sormenen, Galdakaoko Torrezabal aretoan (Bizkaia), kontzertu labur batean. Bereziak ziren formatua eta plaza, eta taldeak alde batera utzi zuen diskoa aurkezteko orain arte erabili duten modua: hura osatzen duten lau kantak etenik gabe jotzea, elkarren atzetik. Atzoko kontzertuan, berriz, euren proiektua aurkezteko aprobetxatu zituzten tarteak, eta, bide batez, txalo jotzeko aukera eman zieten entzuleei. Hernandezen hitzetan, «performatiboa» da haien proposamena. Agertokira igotzen dira arropa bereziak soinean, jantzi luzeak, beltzak eta granateak, botoi deigarriekin. Musikak ez ezik, horrek ere laguntzen du murgiltzen kabaret edo teatro giroan. Esan liteke kantu instrumental batekin abiatu zutela kontzertua, nahiz eta Galbetek abestu egin zuen, harentzat instrumentu nagusia delako ahotsa, eta, hitzik esan gabe, gainontzeko tresnen melodiari lotzen zaiolako, modulatuz, bizitasuna moldatuz. Haren ondoren, Baso kanta leuna, Galbeteren beraren hitzekin, eta, atzetik, Histeria, Galbeteren ahotsaren eta Otxoaren biolinaren arteko elkarrizketa inprobisatu batekin. Iaz, taldeak bideo bat sortu zuen kontu horrekin batera, Maria Elorza zinemagilearekin kolaboratuta, Azpeitiko Sorkuntza bekaren bidez. Hernandok berak jarri zion ahotsa hurrengo kantari, testu bat errezitatuz, antzerki kutsua nabarmenduz. «Munduko erdigunea izatetik mundu oso bat». Ia sei minutuko kanta batekin bukatu zuten kontzertua, D(r)ama, ezti hasi eta lehertzera iritsiz, tristurari lekurik kentzeko asmorik gabe: «Bizi minak ukatu behar direla diote/ aldiz, poza, pozez, pozik/ konstante», esaten zuen Hernandezek idatzitako letrak. https://www.berria.eus/albisteak/191343/teatro-giroko-musika.htm

Disko kritika: “Esan gabe doa” (Muskulo) 2015ean hasi zuen bere ibilbidea Muskulo taldeak, triku bat errepidera atera zuten unean. Geroztik, experimental soundtrack music jorratzen aritu dira – hala dio behintzat haien Mukuru zigiluaren webguneko deskribapenak -, nahiz eta ez duten sekula zinema areto handietarako musika sortzeko saiakerarik egin. Film laburrei bai, horiei jarri izan diete musika, nahiz eta orduko hartan lehenago heldu ziren soinuak irudiak baino. 2017an izan zen hori, hainbat lagunek Lau disko laburreko kanta bakoitzari irudiak jarri zizkiotenean. Irudikatzea baino, iradokitzea izan da, beraz, beraien xedea azken bost urte hauetan; tronpeta, gitarra, baxua eta bateria lanabes nagusitzat hartuta. Esan gabe doa izeneko disko luze hau lan guzti horren ondorio da, oraingoz irudirik gabe datorrena, azaleko margo abstraktua salbu. Hamar kantu dira, denak Muskuloren iruditeria bakarretik datozenak, bakoitzak mundu oso bati ateak zabaltzen dizkion arren. “Bufalo laukotearen odola” da lehena, far west urruneko gaizkile anker bezain karismatiko batzuen balizko istorio baten izena duena. Dotorea da abestia, epikoa ere zenbait zatitan; eta bai, soinu banda baterako ere egokia litzateke. Ildo beretik doa “Roxali”, desertuaren mugetan eta Calexico taldearen koordenadetan koka genezakeena. “Martina”-k, Café Teatro talde gipuzkoarraren Burga diskoaren amaiera dakar gogora, umeen ahotsak erabiltzeaz gain talde hark zuen soiltasunaren zantzuak baititu. Horixe da diskoko piezarik ederrenetako bat, ziur aski. Pasadizo hauen narratzailea den Iker Fernandez kantariaren ahotsak egiten du lehen agerraldia jarraian, besteen bizitzei begira, “bazoaz ala bazatoz?” galdegiten duen pertsona baten nondik-norakoez aritzeko. “Pio XII–New Delhi” du izena kantuak eta kutsu arabiarreko gitarrak eta klarinete bat entzun litezke bertan, beste hainbat konturen artean. “Dale Maikel Nait!” da zerrendan hurrena, Muskuloren hirugarren diskoa entzuten ari garela ohartarazten digun pieza bizi-bizia, eta “La Nouvelle Vie d’Elia”-ren txanda da gero, balalaika batez eta perkusio gisa erabilitako tresna metaliko ezohikoen laguntzaz datorrena. “Euliaren azken hegaldia” da ondorengo kontakizuna, instrumentala, gehientsuenak bezala. Hileta baterako fanfarria batentzat sortutako konposizio egokia izan zitekeen, Big Boytaldekoak ere aseko lituzkeena. Azkenik, “Torero Pon Pon” baxu jolasti baten gainean eraikitako abestia entzungo dugu, eta “Alaia” pieza xumeak Erik Truffazen tronpeta konposizio lausoenak gogora dakartzan “Itsasoa laino dago” herrikoiaren moldaketara garamatza, modu ezin egokiagoan. Bistan denez, zaila da arnasaldi bakarrean disko honek eskaintzeko duen guztia aletzea. Hamaika dira parte hartzen duten elementuak eta une berean jokatzen ari diren partida guztiez ohartzea gaitza gertatzen da batzuetan. Muskuloren musikak aukera zabalak eskaintzen dizkigu, instrumentu, kontzeptu, doinu eta hots bilduma oso bat jartzen baitu gure esku, geuk ere beraien jolasean parte har dezagun. “Zerbait esan nahi dizugu, lerro artean geratu ohi den zerbait, hitzetatik haratago doana”, dio Oarsoaldeko taldeak une batean. Letren arteko hutsunea betetzea da egitekoa, beraz, irudimenarentzat bazka baita Muskulok eskaintzen diguna. Laudatzekoa da egindako saiakera eta eskertzekoa entzuleari egiten dioten gonbita, halako aukerak urriak izaten baitira. https://www.badok.eus/musika/disko-kritika-esan-gabe-doa-muskulo/ Jon Urzelai

Mukuruk Kanaldude herri telebistarekin elkarlanean sail berri bat sortu du. Mukuru Zuzenean Nonahi atala. Bertan Mukuru kolektiboko taldeen zuzeneko bideoak ikusi ahalko dira, 2020ko urtarrilean hasi eta hilabetero bideo berri bat igoko dutelarik bertara. Kanala estreinatzeko Txost! taldearen Zumarragako Kebabeko zuzenekoa igo dute. Kanaldudeko Mukuru sailera joateko sakatu hemen.   Otsailean Paxkal Irigoyenen zuzeneko bat ikusiko dugu, martxoan berriz Hatxek igoko du "Zuzenean Nonahi #3" izango dena eta hurrengoak zein izango diren oraindik ez dakigu. Adi seinaleari!

Mukuru kolektiboaren eskutik, beste festa musikal itzel bat bizitzeko aukera izango dugu abenduaren 28an Urretxu-Zumarragan, Kkinzona, Eltzekondo, eta Urretxu-Zumarragako Gaztetxearen laguntzaz. Mukuru euskal herriko musikari ezberdinak biltzeko asmoz sortu zen 2017an, beraien jarduna kolektibizatu nahirik proiektu ezberdinen bitartez. “Indarrak batuz gure sorkuntzak zabaltzeko asmoz sortu dugu Mukuru. Musika industria hegemonikoari «alternatiba bat» eskaini nahi diogu, sortzailearen eta publikoaren arteko harremana gertukoa eta horizontala izanik. Gure musika bihotzetik egina da, elkar lagunduz, maitatuz, goxatuz, gozatuz…” Festa honetan Mukuru zigilupean bi urteotan argitaratutako diskoez gain, bilduma berri bat argitaratuko da, talde bakoitzaren abesti banarekin. Hurrengo egitasmoen berri ere emango dute. Eta egun guztian zehar zuzeneko musikaz gozatzeko aukera izango da, kalean hasi eta gaztetxean jarraituz. Bakarlari eta proiektu akustikoekin hasi eta oholtzan talde formatuekin amaituko da festa, bidean sorkuntza berri eta harrigarri asko entzuteko aukera izango delarik. Hona egitaraua: 12:00 KALEETAN ZEHAR Peru GalbeteIturriaIsuo ta KezmanPaxkal Irigoyen 19:00 GAZTETXEAN HatxeEkhi Lambert 23:00 GAZTETXEAN Klak!sonTxost!

Urriaren 20an elkartu ginen Mukurutarrok Donostian. Beste gauza batzuen artean Mukuru festa zehaztu genuen, abenduaren 28an izango da Urretxu-Zumarragan. Laster egitaraua eta info zabalagoa. Adi!

Adi mobilizazioei!!! . Txostunek azken hilabetetan abesti-sorta berri bat osatu dute eta uztailean emango dituzten bost kontzertutan aurkeztuko dute. . Oñati, Elizondo, Antzuola, Urretxu-Zumarraga eta Pasai San Pedron izango duzue laukote zoro bezain sinpatikoa aurrez aurre ikusteko aukera. . (2019-07-19 Ostirala) Oñatiko Arrano 20:30 . (2019-07-20 Larunbata) Baztango Gaztetxea, Elizondo 20:30 + Mikel Uraken . (2019-07-21 Igandea) Antzuolako jaixak, Txosnak  21:00 + Ane eta Malen . (2019-07-29 Astelehena) Urretxu-Zumarragako Gaztetxea 19:00 + Trigger . (2019-07-30 Asteartea) Erti, Pasai San Pedroko udal aretoa 19:00 + Trigger

MKR 005Isuo ta Kezman- Bihar akaso13 kantu biltzen dituen diska luzea kaleratu dute Isuok eta Kezmanek.Isuok kantuz eta kitarraz sortuak, Kezmanek koroz eta tronpetaz janztenditu. Kantu alaiak dira batzuk, 'gozagarritasunaren gorazarre etengabea'leloari fidel. Nostalgikoak eta barnerakoiak beste batzuk. Eta tartean,edo dena batera, edo beste nonbait kokatzen direnak beste batzuk. Isuo ta Kezmanek sorturiko galaxia honetan hainbat planeta-ttiki ageridira, eta hainbat espaziuntzi ere bai. 10 lagunetik gora izan diradiskan parte hartu dutenak. Soinuan, irudian, letratan, kantuan... Etaeskeintza berezia egin nahi izan diote Hipolita Uranga Illarramendiri,diskaren grabaketaren hilabete berean zendu zen kolaboratzaile maiteari.Bere ahotsa entzuten da diskan.'Bihar akaso' Zumarragako Etxetxon grabatu zuten 2018ko uztailean. PeruGalbetek egindako bideoklipean har liteke grabaketaren aire bat. CD formatuan kaleratu dute. Durangon aurkitu ahal izango daMusikazuzeneanen postuan, baita zuzeneko aurkezpenetan ere: Abenduaren6an Urretxun, eta 8an Durangon.

Peru Galbete, Txost!, Isuo ta Kezman, Klak!son eta Paxkal Irigoyen Mukurutarrek Mikel Laboaren omenezko jaialdian parte hartuko dute. Zumarragan, Zelai Arizti aretoan ospatuko da Abenduaren 1ean, larunbatez. Arratsaldeko 18:00etan hasita 15 artistak parte hartuko dute, Urretxu eta Zumarragako artistak dira denak eta azken urteetan Zumarraga-Urretxu Mukururen sede izan denez errepresentazio nabarmena izango du Mukuruk. Animatu!

MUKURU kolektiboak bere aurkezpen jaialdia ospatuko du Orereta/ Errenterian datorren Urriak 13an larunbatarekin. Mukuru Euskal herrialdetako herri ezberdinetako talde eta bakarlariek osatu dugun kolektiboa da. Gipuzkoa, Nafarroa eta baita zoritxarrez hainbatetan hegoaldean hain gutxi kontutan hartzen ditugun iparraldeko taldeak ere. Oinarrian elkarrekiko konplizidade eta miresmenak elkartzen gaitu. Helburua esperientziak konpartitzea, elkar elikatu eta elkarrengandik ikastea dira. Norberaren musika sortu, grabatu edo zabaltzeko prozesuan egon daitezkeen aukerak hobe ezagutu eta gauzatzeko. Azken finean, lagunekin, beti delako hobea. Musika bizitzeko era bat konpartitzen duen kolektiboa izaki honaino ekarri gaituzten zalantza, desio eta ziurtasun urriak konpartituz gizartaratzeko unea iritsi zaigu. Horretarako egun osoko egitaraua prestatu dugu. Goizez mahai inguru bat proposatzen dugu, 11:00 tan Mikelazulo Kultur Elkartearen egoitzan. Izenburua “Musika, zergatik kolektiboki kolektiboan” jarri diogu. Gurekin izango dira musikaren munduan modu batera edo bestera era kolektiboan lan egiten duten hainbat ekimenetako partaideak. Amankomunean gauzak badituzte ere esperientzia ezberdinak dira eta haiek ezagutu eta kontrastatzeko aukera izango dugu. Gurean izango dira Bidehuts, Taupaka, Erraia eta Musikazuzenean eko kideak. Bazkalostean Mukuru osatzen duten talde eta bakarlariak zuzenean ezagutzeko aukera izango dugu. Arratsaldez Mikelazulon bertan 18:00 tatik aurrera bakarlari eta kontzertu akustikoekin hasiko gara. Haien kantu sorta erakutsiko digute Isuo eta Kezman, Nigara zuek, Peru Galbete, Hatxe, Paxkal Irigoyen, Iturria eta Seitan. Afalostean berriz Niesseneko aretora joango gara. 22:30 tatik aurrera han izango dira Txost, Klak!son eta Muskulo. Mukuru zer den edo osatzen duten taldeei buruz gehiago jakiteko: mukuru.eus. Kolektiboari buruz edo Urriak 13ko egitauari buruz gehiago jakin nahi ezkero,

Jeudi dernier Paxkal Irigoyen eta Kontsumo Orkestra et le groupe Txost! donnaient un concert au Gaztetxe d’Itxassou à l’occasion de “Mukuru besta”, la “fête de Mukuru”. Elle était organisée pour faire la promotion du collectif du même nom. Né aux environ de décembre dernier, le collectif réunit à ce jour onze artistes ou groupes d’artistes : Paxkal Irigoyen Seitan, Muskulo, Hatxe, Txost, Kaskezur, Klak!son, Peru Galbete, Isuo ta Kezman, Nigara Zuek et Iturria. Ils proviennent des quatre coins du Pays Basque et ont en commun au moins deux choses : la création musicale en basque d’une part, et la volonté d’évoluer hors du circuit de l’industrie de la musique, de l’autre. En effet, les artistes de Mukuru préfèrent s’écarter des outils et des réseaux de l’industrie de la musique, tels youtube. Ils préfèrent une scène “concrète” et veulent trouver des moyens alternatifs pour se faire connaître auprès du public. C’est justement pour cela que Mukuru devient intéressant. “Jusqu’à présent, chacun s’arrange de son côté pour faire la promotion de son disque. L’idée avec Mukuru est de se réunir pour mettre en commun des savoirs, un réseau, des compétences”, explique Paxkal Irigoyen, qui fait partie du collectif. Concrètement, Mukuru leur permet d’avoir une vitrine sur le web grâce au site internet Mukuru.eus, où leur musique est disponible et leur contact accessible. Les liens entre les artistes leur donne accès à des dates de concert plus facilement, tandis que les artistes du collectif s’engagent sur les disques de ses collaborateurs de Mukuru. “Le collectif vient de naître en début d’année, nous avons chacun des idées”, continue Paxkal. Ils doivent à présent les mettre en commun et les préciser, afin de faire une réelle place aux artistes hors du circuit hégémonique de l’industrie de la musique.

Berria eta Badok atari digitaleko artikulua: Sortzaileen kolektibo berri bat sortu dute: Mukuru Musika industria hegemonikoari «alternatiba bat» eskaintzeko gogotan jaio da Mukuru. Euskal Herri guztiko 11 taldek osatzen dute gaur-gaurkoz: Paxkal Irigoien, Hatxe, Txost, Kaskezur, Klak!son, Muskulo, Peru Galbete, Seitan, Isuo ta Kezman, Nigara Zuek eta Iturria. Txost eta Isuo eta Kezman taldeetako Josu Isaiasek azaldu du asmoa: «Musika industrian ikusten dugunaren aurrean, sortzailearen eta publikoaren arteko harreman gertukoago eta horizontalago bat izan nahi dugu. Guk sortua izatea, musika industrian mugitzen diren multinazionaletatik kanpo». Euren musika zabaltzeko «bestelako bide batzuen aldeko apustua» egin nahi dutela azpimarratu du Isaiasek, egungo industrian nagusi diren «Youtube, Spotify, Facebook eta antzeko bideen» ordez. Kaskezur izan zen Mukuru zigilupean diskoa ateratzen lehena, eta gainontzekoek ere hala egingo dute aurrerantzean. Kaskezur taldearen diskoa da Mukuruk argitaratutako lehenengoa. Musika sortzaileen arteko harremanean ere sakondu nahi dute, «elkarlanean, bakoitzak bere bailara ere gainditu dezan». Musikarien arteko kolaborazioak jada sortzen hasi dira, Isaiasen arabera. Mukuru festak Kolektiboa eta berau osatzen duten taldeak «jende gehiagorengana» iristea da orain Mukururen lehen asmoa. Web orria sortua dute horretarako —www.mukuru.eus—, eta zenbait «Mukuru festa» antolatzen ari dira han-hemen. Antzuolan (Gipuzkoa) egin zuten lehena, eta Itsasuko (Lapurdi) Goxoki gaztetxean izango da hurrengoa, hilaren 31n, ostegunez.

Mukuru besta (edo jaixa)-ren bigarren atala, maiatzaren 31an iraganen da, Itsasuko "Goxoki" gaztetxean ! Hitzordua gaueko 20:30-tan eta bertan kolektiboko 2 taldek joko dute : - Paxkal Irigoyen eta Kontsumo orkestra - Txost !